Hjem » Skole » Støttemateriell » 4.-7. trinn » Privat: Trafikkopplæring på sykkel » Sykling i vegkryss – nynorsk

Sykling i vegkryss

Gje teikn

Når du syklar i vegkryss er det viktig å vise kva du har tenkt å gjere, slik at andre trafikantar forstår kvar du skal. Syklar har ikkje blinklys slik som bilane, og du må difor rekke ut arma for å vise kva veg du skal.

Du skal gje teikn både når du svingar i vegkryss og når du svingar forbi ei hindring. Men hugs: sjølv om det er viktig å gje teikn, er det enda viktigare at du ser deg godt for før du svingar.

Slik gjev du teikn

  • Senk farten og sjå etter annan trafikk. Hugs å sjå deg bakover.
  • Rekk ut arma til den sida du skal svinge når det er klart.
  • Hald begge hendene på styret gjennom svingen.

Spørsmål:

  • Kvifor skal du gje teikn før du svingar, og korleis gjer du det?

Rett fram i vegkryss

Senk farten når du kjem til krysset og sjå deg godt rundt. Om det er klart, kan du fortsette over krysset.

Ver merksam på at bilistar som køyrer forbi deg før eit vegkryss også kan komme til å svinge til høgre rett framfor deg. Sjølv om bilisten har vikeplikt kan syklisten bli påkøyrd fordi han er i blindsona til bilisten.

Spørsmål:

  • Kva er blindsona til bilisten?

Høgresving i vegkryss

Sjekk at det ikkje er andre syklistar som er på veg forbi deg på høgre sida. Senk farten og gje teikn med høgre arm. Du skal ha to hender på styret gjennom svingen.

Det løner seg å halde god avstand til fortauskanten eller vegkanten.

Hugs at du har vikeplikt for fotgjengarar som kryssar vegen i gangfelt, også i den vegen du svingar inn i.

Spørsmål:

  • Kvifor er det lurt å halde god avstand til fortaus- eller vegkanten, trur du?

Venstresving i vegkryss

Det er mykje å ta omsyn til når du skal svinge til venstre i eit vegkryss. Det kan komme køyretøy frå fleire kantar samtidig, noko som gjer det vanskeleg å få god oversikt over kva som skjer i krysset.

Du kan svinge til venstre på to måtar:

  • Ved å bruke fortau og gangfelt
  • Ved å ta ein stor venstresving

Den tryggaste måten er å svinge til venstre ved å bruke fortau og gangfelt der det finst.

Venstresving – bruke fortau og gangfelt

Slik gjer du:

  • Sjekk om det kjem annan trafikk rett bak deg.
  • Stans roleg ved fortauet utan å forstyrre andre trafikantar.
  • Trill sykkelen eller sykle forsiktig opp på fortauet. Vis omsyn til fotgjengarar.
  • Sjå deg godt for til begge sider og bakover ved gangfeltet.
  • Når det er klart, trillar du sykkelen over gangfeltet som fotgjengar.

Er det mykje trafikk kan du fortsette å sykle på fortauet. Er det lite trafikk kan du bruke vegen. Men hugs at du har vikeplikt for annan trafikk når du kjem ut i vegen frå fortauet.

Stor venstresving

Om du skal til venstre i kryss der det ikkje er fortau og gangfelt, kan du sykle på denne måten:

  1. Sjå etter trafikk frå høgre og venstre. Hugs reglane om vikeplikt. Ver merksam på at det kan komme trafikk bakfrå, og som vil svinge til høgre framfor deg. Vent til desse har passert før du syklar vidare.
  2. Når det er klart, syklar du rett fram over krysset og stansar tett inntil kanten på motsatt side.
  3. Vend sykkelen 90 grader, forsikre deg på nytt om at det ikkje kjem annan trafikk før du syklar over krysset.
  4. Fortsett vidare langs høgre side.

Sykling i rundkøyring

Når du kjem til ei rundkøyring, er det tryggast å gå av sykkelen og krysse vegane som fotgjengar, slik som på bildet.

Slik gjer du:

  • Trill sykkelen eller sykle sakte på fortauet. Vis omsyn til fotgjengarar.
  • Sjå deg godt for til begge sider og bakover ved gangfeltet.
  • Forsikre deg om at trafikantane i vegen har sett deg.
  • Når det er klart, trillar du sykkelen over gangfeltet som fotgjengar.

Spørsmål:

  • Kvifor bør du gå av sykkelen og trille den forbi rundkøyringa?

Læringsmål for sykling i vegkryss

Du skal kunne:

  • Vite kvifor det er viktig å gje tydeleg teikn for å vise kva du har tenkt å gjere i trafikken.
  • Vise korleis du gjev teikn for kva retning du skal i vegkryss.
  • Vise korleis du skal sykle når du skal rett fram i vegkryss.
  • Vise korleis du skal sykle når du skal svinge til høgre i vegkryss.
  • Vise korleis du skal sykle når du skal til venstre i vegkryss.
  • Vise korleis du skal sykle når du kjem til ei rundkøyring.